سوفيا مې په کالج کې ملگرې شوې وه. اوس يې
واده دى او زه يې ورته خبره کړې يم. انگرېزان لږ ودونه کوي اړتيا يې نه ويني. هلک
او نجلۍ دواړه سره يو ځاى اوسيږي او حتى ماشومان زېږوي. سوفيا ته مې وويل په تا
نو څه راغلې ده چې د نورو انگرېزانو خلاف کار کوې. دې په خندا راته وويل:
-شهزاده ويليم او کېټ واده کوي زه يې ونه کړم.
څه مې ورته ونه ويل. دې به پخوا ويل واده هسې د پيسو مصرفول دي نور نو په کې څه دي؟
سوفيې له ما غوښتل چې ورسره بازار ته ولاړه
شم. ما کار کاوه او د کار څښتن ته مې نه شواى ویلى چې د ملگرې د واده لپاره رخصت
راکړي. دې لار را وښووله:
- سهار کار والاوو ته زنگ ووهه ورته ووايه
بايد عاجل ډاکتر وگورې نو لږ به ناوخته ورشې.
سوفيې پر ما اول ناز کړى و ورسره ومې منل او
د دې لپاره مې درواغ وويل.
بازار ته چې سره رهي شو سوفيې د واده له
لگښتونو سر ټکاوه. ويل يې ټول ټال زر پونډه لري چې سمې نيمې د دې دي او نورې يې د
خاوند دي. په کليسا کې نکاح تړي او د هوټل پر ځاى په يوه پب کې ملگرو ته محفل
جوړوي. پب د دوى د شراب څښلو او له يوه بل سره د ليدو کتو ځاى دى.
نامزاد يې د پب په سينگارولو او د څښاک
برابرولو پسې تللی وه. دې چې د پب خبره راته کوله نو لکه ناڅاپه چې يې کومه خبره
ورياده شوې وي يو دم راته وويل:
- هې ما ورته ويلي چې تش جوس هم څو بوتله
راوړي.
- اوووو ډېره مننه داسې دې وويل لکه رشوت چې
را کوې.
- هاها نه نه ته مې په ياد وې.
- ته څه شى اخلې؟
- اول به د زرګر دکان ته لاړ شو.
ولې تاسې خو چلې په انترنېت کې اخيستې وې؟
هو خو هغه شرکت بايد کور ته رالېږلې واى.
- در وبه يې لېږي بيړه دې د څه ده؟
ورځ يې پرون وه.
ممم زنګ دې ورته وهلای؟
هو ويل يې څه ګړ بړ دی له دکانه يې يوسه؟
موضوع مې بدله کړه ومې پوښتله:
څومره مېلمانه را غواړې؟
زما د مور، پلار او ورور په ګډون ۲۵ کسه يوو!
۲۵
هو ستا څه خيال دی ټول لندن را خبر کړم؟
۲۵ کم نه دي؟
کم؟
اوس هم ډېر دي. زما که خوښه وای يوازې ۲۰ مې
را غوښتل. هغه راتلونکی پاچا ويليم او کېټ دي چې ۶۰۰ خلکو ته به ډوډۍ ورکوي.
زه غلې شوم. نه مې غوښتل بې منطقه ورته
ښکاره شم.
د لندن په زړه کې تر ټولو گران بيه سيمه
چلسي وه، سوفيې هلته بوتلم. بيا يې يوه دوکان ته ودرولم راته و يې ويل:
دا هغه دوکان دى چې هغه تېره ورځ ورته کېټ راغلې وه
ممم پوه شوم. اوس ژر کوه چې بايد زه کار ته
ورشم.
له جيبه يې کاغذ را ويست، د ځينو شيانو
نومونه پرې ليکل شوي و، راته ويې ويل دغه شيان ورته را واخلم خپله ولاړه چې د واده سپين کميس واغوندي. ما د دې له غوښتنې سره سم پر کاغذ ليکلي ټول شيان راټول کړل.
دې ته مې راوړل دې کميس اغوستى و راته ولاړه وه چې نظر ورکړم.
اووو دا کميس بيخي را کې جوړ دی. کنه؟
جوړ هم دى او ډېر ښکلى هم دى
سوفيې دوکان ته په بانکي کارډ پيسې ورکړې.
خپله زرگر ته لاړه او زه ترې کار ځاى ته رهي شوم.
په منډه د اورگاډي تم ځاى ته ننوتم. پر لارې
مې د سوفيې په زرو پونډو او ۲۵ مېلمنو چورت واهه. سوفيا ښه کار لري، خاوند يې هم
بې کاره نه دى، ژوند يې ښه دى خو پر واده څومره لږې پيسې لگوي.
د کار ځای ته نژدې وم. په کار کې نوې يم. دا
د بانک په شان د پیسو لېږلو يوه کمپنۍ ده. دوه مياشتې مې کيږي چې کار په کې کوم.
خبره مې له ځانه سره جوړوله چې څه ووايم. که مې ریيس وويل ولې داسې نا ببره ناروغه
شوم او د اپواينتمنټ مې ولې مخکې څه نه و ويلي. هيڅ ځواب مې نه درلود.
خو راسره ومې ويل ځه شل په لالي باندې دا
يوه د بنګړو. هر څه که هلته په خوله راغله وبه يې وايم.
زړه مې درزا کوله دروازه مې خلاصه کړه. ژر
ژر خپل مېز ته کښېناستم. ډېر کسان په لاين کې ولاړ وه. ټولو پيسې لېږلې. په ليکه
کې چې د چا نوبت وه زما مېز ته راغی. د شيشي له بلې غاړې مې د سړي سلام واورېده.
ويل که په فارسي ورسره خبرې وکړم ښه به وي.
ما هم سر ورته وخوځاوه، په ايراني لهجه يې خبرې کولې.
سړی غصه ښکارېده. ويل ۱۰ ميليونه تومان
تهران ته استوي.
۵۵۱۰ پونډه کيږي.
څه يې ونه ويل، پوه شوم چې ويې منله، ورته
ومې کتل، شونډې يې ځړېدلې، له قهره اېشيده، ومې پوښت:
- چا ته يې ليږې لطفآ؟
غږ يې يو څه لوړ شو:
خواښې ته مې.
نوم به حتمآ لري
سړي ټول معلومات له پيسو سره راکړل، دی
افغان و.
ما يې پيسې د پيسو شمېرلو په ماشين کېښودې،
پوره وې رسېد مې ورکړ.
سړي په غصه مننه وکړه، روان شو. ور پسې مې
په يو څه لوړ غږ وويل چې وايې وري.
- خواښې مو ډېره نېکمرغه ده.
سړي شاته وکتل ويې ويل:
ای پېشکش اه (است).
پرې پوه نه شوم. د څنګ همکارې مې سلام
راکړ. دا افغانه ده خو په ايران کې زېږېدلې. و مې پوښتله چې پېشکش يې څه وي؟
راته ويې ويل: ولور دى.
هلته هم افغانان ولور اخلي؟
خود يې اخلي. ټيټه بيه يې ۲۰ ميليونه
تومانه ده، له دې سر بېره به په هوټل کې درې محفلونه هم وي.
مانا ۱۱۲۰۰ پونډه؟
هو
نجلۍ بايد څه کمال ولري؟
هيڅ دا معمول نرخ دی.
که مې خپله انگرېزه ملگرې وليده ورته وايم
چې هسې له جيبه پيسې ورکوي. همکارې مې وويل:
څوک يادوې، د شهزاده ويليم کېت يادوې؟
No comments:
Post a Comment